團結一致與同流合污

成日有人同我講團結,但多數成日叫人團結嗰D人,一係就出賣你、一係就係排斥行動嘅打手、一係就為左利益。最後,呢班咁「團結」嘅人就可以名正言順地站在某一個範疇嘅道徳高地上,佔領住呢一個範疇嘅光環,發展「大佬主義」。而其他喺同一個範疇嘅人只會成為佢地排斥行動嘅目標。

民主黨成日都話要團結飯民,吸埋公民黨、民協、工黨等飯民小政黨組成所謂飯民主派。民主黨就正正佔領住「飯民主派」呢個光環,構成一副唯我獨尊嘅心態。論出賣?佢地出賣咗香港人通過2012政改,又唔堅持公民提名,向中共極權政府獻媚。論排斥?佢地咪做代表去攻擊激進民主派派,。論利益?咪係一眾港豬俾佢地嘅選票同埋可以企喺民主派嘅高地上。最後,呢班人唔係叫團結一致,而係叫同流合污。

而我,成日都見到好多好似民主黨嘅人,成日口邊掛住團結兩個字,成日同人哂呢個「團結大家庭」有幾咁溫馨,喺身邊某D群體之間扮哂大佬。齊齊玩排斥。點⋯⋯解佢地咁夠薑?因為呢班人好識得用花言巧語招人加入呢個「團結大家庭」,甚至識得利用呢個「團結大家庭」去引埋一尐俾自己更高地位嘅人作為排斥行動嘅籌碼,將世間上一切歪理合理化。最慘就係自己一定要生存喺呢個空間,一定要對住呢尐「團結大家庭」。而老實講,我唔會俾呢尐「團結大家庭」支配到,因為我已經對呢尐「團結大家庭」好睇唔過眼。

而家可以做嘅野就係食花生。因為無論我有幾睇唔過眼,呢尐群體已被「團結大家庭」佔領咗。批評只會視為異見,甚至將我寫入排斥名單,佢地只會睬你都生芒果。不過我唔怕,因為同流合污之事我絕對做唔出,我唔會因為係某群體嘅人而加入入面嘅「團結大家庭」。我睇得好清楚,我所屬於嘅係呢個群體嘅人而並非呢D「團結大家庭」嘅一份子,兩樣野冇連繋嘅(只係「團結大家庭」覺得有)。正如話自己支持民主派都唔會等於支持民主黨一樣。

「不怕孤立,才可獨立」切記不要因群體某D所為大佬叫你加入佢地嘅「團結大家庭」而為團結而團結,要睇清楚呢尐「團結大家庭」為自己嘅群體做咗尐乜野。

Share on Google Plus

About Unknown

作者介紹請點上方工具欄「網誌資訊」下「作者」一項