課室政治(三)

政治,從來係複雜嘅。我認,呢門咁複雜嘅學問我的確只係一個新手。
但冇計,我份人就係咁直腸直肚,容易攤牌、不留餘地、得罪人。自問攻心計又不精,平日唔出聲講已經係我最大嘅限度。
我知,呢班人我下年有機會見到。但又係咪可以代表我要保持必要的沉默,廢事得罪人?你估我唔想食花生,繼續由得佢地圍威喂。兩耳閉關充耳不聞。係冇可能,因為我踏得入呢個圈就冇得走,冇得搬龍門。況且我又唔係D乜野要顧面子、在課室有地位嘅人,所以我先咁夠薑咁寫。正如現實社會,激進派成日被主流傳媒、政府抹黑,但係從來冇因此而放棄抗爭,面對一切謾罵仍堅守立場。也許你會覺得好傻好好笑。但事實就係咁。愈早表明立場早D話俾人知自己點諗,旗幟鮮明始終好過收收埋埋,難以觸摸。
係,我作為小家庭嘅一分子,對大家庭好不滿。你問我幾時變得咁多聲氣,坦白講就係三個月前嘅選票風雲。眼見一班人種乜前種乜後,完全無視選舉意義。不過件事過左咁耐,無謂再翻舊史。自從嗰次,我認清左班房入面有一大班人可以有咁強大嘅能力操控成個課室,以團結為名把佢地呢個「比較大的群組」變為課室內唯一合法組織,名正言順地將兩者劃上等號。而我呢D「犯人」,絕對不會因為自己係5C班嘅一分子而同呢個「比較大的群組」劃上等號,不會為團結而團結。因為我知兩者係有分別。

既然係咁我唯有加入小家庭抗衡呢個大家庭。另外,我亦都從呢個處境揾番屬於自己對呢班嘅定位。
1)「不怕孤立,才可獨立」
講得出令大家庭頂耳嘅說話就預左被孤立,不會搖尾乞憐氹番人。因為說話如覆水同樣難收,氹人只會突顯自己虛偽。從而獨立,不受大家庭支配。
2)「孤獨萬歲,失戀無罪」
減少對大家庭接觸,只視「5C班」為一個學習嘅地方,務求在此完成中學課程,因為我已失去對班房的留戀。
3)「讀完個中六就算數」
意指一旦有幸能於此班完成中六後(並不代表我已放棄學業),灑脫地離開。只保留班上部分人嘅友誼,然後抹去對此班的記憶。好似幫一部電腦backup定重要資料,然後洗機。
「人在江湖,身不由己」

也許係我犯賤,要放低手上包花生,自己走入呢個鬥爭嘅深淵,自甘墮落。
亦都因為我咁犯賤、咁冇地位、咁唔要面、咁鬼唔妥,所以先咁豁出去表達自己立場。
政治,從來係複雜嘅。我認,呢門咁複雜嘅學問我的確只係一個新手。
Share on Google Plus

About Unknown

作者介紹請點上方工具欄「網誌資訊」下「作者」一項
    Blogger Comment
    Facebook Comment

1 意見 :

  1. 加油。只是班這個那麼小一個團體,不必為此仇恨。當他們是一群羊吧。一群羊不值得人類生氣。主力關心下大社會。

    回覆刪除