此文純屬本人表達自己對昨日送別2C時某班車內「巴士迷」的行為,本人無意指明道姓去針對或惡意攻擊任何一位巴士迷,我認為人人也應為自己的行為負責。請各位留意。
=========================================================================
琴晚本來懷着享受的心情去搭2C,點知,這班車給我的感觸很多。
琴日我搭嗰班車喺夜晚九點(SF5443)開,我以乘客嘅角度去話俾大家知E班車發生乜事,如果有當時車上客指出我嘅描述有錯的話,歡迎提出意見。
首先,一上車,有為數約十五位「巴士迷」上車(是小童和中學生),有位「巴士迷」上車講:「有D想跟車添!」,跟住司機講左三次:「請各位入足錢。」之後我只聽到一兩聲投錢聲。
一開車,佢地不停大吵大鬧,又嘈又爆粗。當中有人高聲模仿報站聲及用手機開大喇叭播放影片。佢地仲堆在車頭的通道,在車廂內走來走去。在車程一半,有人三位「巴士迷」更在車廂內開閃光燈拍照。當中雖有一巴士迷挺身而出,呼籲大家安靜,亦有管理秗序,但成效不大。
我想問:ED應該係巴士迷或乘客應在車廂內做嘅野嗎?
第一,成班「巴士迷」在車廂大吵大鬧,又嘈又爆粗,又高聲模仿報站聲及用手機開大喇叭播放影片。。嚴重影響乘客。當正架車係自己咁,你話你比左錢包車我就吹你唔脹啫,而家成車仲有五六位乘客,E種行為有阻車廂內的安靜,對於車內乘客是一種不尊重的行為。試想想,平時有人在巴士高聲談電話,你地都會不爽,會叫佢靜D。何況E種滋擾比起高聲談電話的人高百倍。
第二,我真係唔明成班「巴士迷」點解要企喺車頭,大佬呀,SF5443係一架單門巴士,乘客上落都要靠E道前門。你地企哂喺車頭非常阻礙乘客上落。另外,你地企哂喺車頭位置,又在車廂內走來走去,車長又要睇住你地,加上又嘈吵,ED行為嚴重影響車長駕駛安全。如果一旦因為咁而炒車,除左你地自討苦吃之外,其他乘客嘅安全又係咪你地負責?
第三,E班「巴士迷」ED行為完全顯出佢地冇心送車,完全係開PARTY狀態。當正架車係自己屋企咁。大佬呀,冇心送車唔好係度玩玩吓咁,又嘈又講廢話。完全喪失巴士迷送別車或線的意義。
近年「巴士迷」E個名份已經被香港人唱到一文不值。你話佢地抹黑咩?從以上行為大家有目共睹,甚至乎又偷牌偷揸車。係,可能你話ED只係某部份「巴士迷」嘅行為。但係ED行為正正影響全部「巴士迷」嘅聲譽,如果我地唔去阻止,E班人敗壞「巴士迷」聲譽嘅人只會愈多而不會減少,巴士迷意指一群用心喜愛巴士嘅人,近年有部分「巴士迷」己變質,只追求物質,跟車,籠絡車長,甚至偷牌偷揸車......,他們亦以「巴士迷」自居,但相比起一向用心喜愛巴士嘅人有天淵之別,而且E班「巴士迷」亦正正蠶蝕着整個巴士迷界,其禍害是非常嚴重。
俗語有云:「一粒老鼠屎可以搞禍成煲粥。」,喺而家嘅巴士迷界,「巴敗」「巴膠」隨處可見。就我個人意見:作為八年巴士迷,以前覺得巴士迷係我嘅光榮,因為以前做巴士迷有一種捍衛巴士文化嘅作用,巴士公司同巴士迷關係良好。自從2012熱狗退役一事,巴迷數量大增,但當中有不少「巴敗」「巴膠」,當時GK9112偷行車證同獲30X獲嘉之亂令傳媒關注,D瘀野上哂報紙。D,「巴敗」「巴膠」仲死性不改。巴士公司與巴士迷決裂。而家嘅我對巴士迷E個身份感到羞恥。真係多得D「巴敗」「巴膠」唔少。再極端D講,我唔希望日後同人講自己係巴士迷嘅時候,人人會以歧視嘅眼光望我。所以,我希望同我志同道合嘅巴士迷可以一齊去阻止E班「巴敗」「巴膠」。以免日後巴士迷被社會排擠。
我仲記得琴晚班車到尖沙咀時,有位「巴士迷」問:「全車係咪全部都係巴迷?」,我和友人皆不語。如果你話E班友先叫「巴士迷」,咁我唔係。另外,請E班所謂「巴士迷」嘅人,唔好再令巴士迷界繼續沒落和沉淪,俾番一個正面形象俾巿民,咁先可以令巴士迷界進步。亦請各位巴士迷思考吓自己做嘅野有冇錯,有冇比俾負面形象俾巿民。
最後,我會放一張當時車內「巴士迷」嘅相比大家,我覺得人做野做得出唔怕認。我認張圖係我拍。但希望相中嘅「巴士迷」好好反省一吓,而唔係去做一D惡意嘅批鬥。
0 意見 :
發佈留言