「第一千三百一十九次實驗，實驗體已經被粒子包圍。」一個高大的助手正紀錄著數據，「粒子共鳴率突破百分之六十……六十七……接近穩定水平！」
終於可以成功了嗎……？我不禁興奮起來。這十多年來費盡心思，終於可以跟那個人見面──
「警告！警告！」忽然，實驗室中所有寫著「WARNING」的紅燈亮起。
「發生咩事！？」。
那些工作人員全都不知所措的看著我：「粒子共鳴率下降……連結因為某種不明原因，被強制中止咗！」
「終止實驗。」我沉著臉說道，「從第D709程序重新檢查，然後準備多一次。」
「鞠博士……我可唔可以問你一個問題？」高級研究主任蔡瀚玲走了過來。
「問。」
「其實點解你要堅持進行呢個實驗？所謂嘅第二個世界根本連存唔存在都係未知……」她問道，「值唔值得為咗一個連理論都尚未完整嘅實驗浪費咁多資源？」
「我要……搵返一啲過去失去咗嘅嘢。」我沒有多作解釋，因為我知道怎麼解釋她都不會明白。「而且我可以好肯定，第二個世界真係存在……」
「因為我識得一個人，就係從第二個世界嚟，後來又返咗去。」我自顧自的說下去，「呢種K5粒子都係我目擊佢消失嘅時候發現。」
蔡瀚玲半信半疑的看著我，似乎覺得我只是胡亂編了個故事。
「博士，呢個實驗體已經唔能夠再承受下一次實驗……」一個工作人員向我報告，「再繼續落去佢會死。」
「將佢帶走。」我看了一眼那個遍體鱗傷的死囚，「你已經唔使死，我應承過，只要做我嘅實驗體，囚犯就可以由死刑轉為終身監禁。」
第七百六十二個實驗體……全部都失敗收場。
「嚟緊會係最後一次實驗……」
我產生了一個想法：或許實驗的失敗，只有一個方法解決，那是我之前曾經做過的一個假設。
「……由我親自做實驗體。」
「博士！」
「太危險喇博士！」
「唔可以咁做架，太亂嚟喇！」
反對的聲音此起彼落，甚至有人願意代替我做實驗體。
「博士，既然你咁執意要繼續個實驗，就由我做實驗體啦……」幾個年輕的助手走到我面前表示，「我哋一個一個嚟，直到博士嘅實驗成功為止……」
他們都是一些相信其他世界存在的學生，畢業後就自願到這裡來當義務助手。
「我相信一定要由我自己參與其中，呢個實驗先會成功。」我拒絕了他們的好意，「如果我成功去咗第二個世界，你哋就去睇我留低嘅論文草稿，裡面有一個未證實嘅理論……如果我成功，就可以證明個假設係啱。」
我把一切都安排好之後，就走進了用作實驗的機器中。
「開始。」
肉眼可見的粒子開始把我包圍起來。
求求你──
「第一千三百二十次實驗，開始釋放粒子……！」那個高大的助手緊張的說道。
讓我再一次遇上你──
「粒子共鳴率突破百分之五十……六十……六十六……」
讓我實現與你之間的約定──
「七十一……七十八……達至穩定水平！」
本來是淡綠色的粒子開始綻放出白色的光芒，我也閉上了眼睛。
「博士開始消失喇……」充滿驚奇的聲音。
也是我最後聽見的聲音。
0 意見 :
發佈留言